Krahas ilahive, numrave teatralë dhe poezive të ndryshme dedikuar mirësive dhe begative të këtij muaji të shenjtë, përgatitur dhe performuar nga vetë nxënësit e Medresesë, ky program përmbante edhe fjalën përshëndetëse të Nënkryetarit të Komunitetit Mysliman të Shqipërisë, z. Taulant Bica dhe Drejtorit të Medresesë së Tiranës, z. Ndriçim Gjimi.

Mbrëmja u çel me leximin e disa ajeteve Kuranore, të sjella për të pranishmit e shumtë nga hafizi Enes Hyka.

Për të vijuar më tej me fjalën përshëndetëse të Drejtorit të Medresesë, i cili pasi falenderoi të pranishmit për pjesëmarrjen, përgëzoi nxënësit për këtë iniciativë kaq të bukur në organizimin e kësaj mbrëmjeje dhe i uroi të gjithë një agjërim të lehtë e të pranuar.

Ndërkohë Nënkryetari Bica, në fjalën e tij të rastit preku disa nga veçantitë e këtij muaji të bekuar, duke e cilësur atë si një kohë reflektimi, përmirësimi, afrimi me Zotin, me familjen dhe me njerezit që na rrethojnë.

“Ramazani është një shkollë e madhe për shpirtin dhe për karakterin tonë. Në këtë muaj ne mësojmë të jemi më të vetëdijshëm për fjalët dhe veprimet tona, të tregojmë më shumë dhembshuri dhe dashuri ndaj të tjerëve, të shtojmë adhurimet tona, e gjithashtu të kalojmë më shumë kohë me familjen, të afërmit dhe të tregohemi më të vëmendshëm ndaj shtresave në nevojë” – theksoi ai gjatë fjalës së tij.

Në këtë mbrëmje festive morën pjesë nxënës, prindër, drejtues e përfaqësues institucionesh të ndryshme si dhe të ftuar të shumtë.